கவிதை

என்னை நான் உங்களுக்கு அறிமுகப்படுத்துகின்றேன்
நான் ஒரு பெண்
பிறந்த போதே
பெண் என்று உங்களால் அடையாளப்படுத்தப்பட்டவள் நான்
அடையாளங்கள் உங்களுக்கு இலகுவாயிற்று
அடையாளங்களை ஆகர்ஷித்தீர்கள்
அடையாளங்களைக் கொண்டு என்னைக் கட்டிப்போட முனைந்தீர்கள்

அடையாளங்களை நான் வெறுக்கின்றேன்
அவை புற்று நோயைப் போல் என்னை அரிக்கக் கூடியவை
விலங்குகளாகி எனை சிறையில் பூட்ட முயலுபவை
பொதியை என்மேல் திணிப்பவை
அடையாளங்கள் அழிக்கப்பட வேண்டியவை

பெண் என்பதாய்
உங்களால் எனக்குக் கொடுக்கப்பட்ட
அத்தனை அடையாளங்களையும் அழித்து விட்டேன்
அடையாளங்களின் அடைகலம் எனக்கு வேண்டியதில்லை
இனி எப்படி என்னை அடையாளம் காணப்போகின்றீர்கள்?

நான் என்னை நானாக அடையாளம் காண்கின்றேன்
முடிந்தால்
உங்கள் அடையாளங்களையும் அழித்துக் கொள்ளுங்கள்
துருப்பிடித்த இரும்புகளாலான
உங்கள் இதயங்களை உடைத்து விடுங்கள்
உங்களை என்னால் அடையாளம் காண முடியும்


விலாசம் அற்ற வீடு என்னுடையது
நான் ஒரு பெண்
பெண் என்பதற்காய் நான் பெருமைப்படுகின்றேன்.